ਅਮਰੀਕਾ ਦੇ ਪਿਆਜਾਂ ਨੇ ਕੈਨੇਡਾ ਚ ਪਾਇਆ ਭੜਥੂ, ਅਲਰਟ ਜਾਰੀ

ਓਟਾਵਾ : ਪਿੱਛਲੇ ਮਹੀਨ ਤੋਂ ਖ਼ਬਰਾਂ ਸਾਹਮਣੇ ਆ ਰਹੀਆਂ ਸਨ ਕਿ ਕੈਨੇਡਾ ਤੇ ਅਮਰੀਕਾ ਵਿਚ ਲਾਲ ਪਿਆਜ਼ ਕਾਰਨ ਕਈ ਲੋਕ ਬੀਮਾਰ ਹੋਏ ਹਨ। ਤਾਜ਼ਾ ਜਾਣਕਾਰੀ ਅਨੁਸਾਰ ਕੈਨੇਡਾ ਸਿਹਤ ਮੰਤਰਾਲੇ ਨੇ ਲੋਕਾਂ ਨੂੰ ਚੌਕਸ ਕੀਤਾ ਹੈ ਕਿ ਸਿਰਫ ਲਾਲ ਹੀ ਨਹੀਂ ਪੀਲੇ ਤੇ ਚਿੱਟੇ ਪਿਆਜ਼ ਵੀ ਬੀਮਾਰੀ ਦੀ ਜੜ੍ਹ ਬਣ ਗਏ ਹਨ। ਇਸ ਕਾਰਨ ਕੈਨੇਡਾ ਭਰ ਵਿਚ 506 ਲੋਕ ਬੀਮਾਰ ਹੋ ਚੁੱਕੇ ਹਨ । ਇਹ ਖ਼ਬਰ ਮਿਲਦਿਆਂ ਹੀ ਕੈਨੇਡੀਅਨ ਲੋਕਾਂ ਨੇ ਪਿਆਜ਼ ਆਪਣੇ ਘਰੋਂ ਬਾਹਰ ਸੁੱਟਣੇ ਸ਼ੁਰੂ ਕਰ ਦਿੱਤੇ ਹਨ। ਹਾਲਾਂਕਿ ਵੱਡੇ ਸਟੋਰਾਂ ਵਲੋਂ ਵੇਚੇ ਗਏ ਪਿਆਜ਼ ਵਾਪਸ ਲੈ ਲਏ ਗਏ ਸਨ ਪਰ ਬਹੁਤੇ ਵਿਕ ਚੁੱਕੇ ਸਨ, ਜਿਸ ਕਾਰਨ ਲੋਕਾਂ ਨੂੰ ਇਸ ਦੀ ਜਾਣਕਾਰੀ ਦਿੱਤੀ ਗਈ ਹੈ। ਅਮਰੀਕਾ ਤੋਂ ਆਉਣ ਵਾਲੇ ਇਹ ਪਿਆਜ਼ ਸੈਲਮੋਨੇਲਾ ਬੀਮਾਰੀ ਫੈਲਾ ਰਹੇ ਹਨ, ਜਿਸ ਕਾਰਨ ਪਹਿਲਾਂ ਵਿਅਕਤੀ ਦੇ ਪੇਟ ਵਿਚ ਦਰਦ ਹੁੰਦੀ ਹੈ ਤੇ ਫਿਰ ਹੌਲੀ-ਹੌਲੀ ਉਸ ਦੀ ਹਾਲਤ ਇੰਨੀ ਗੰਭੀਰ ਹੋ ਜਾਂਦੀ ਹੈ ਕਿ ਉਸ ਨੂੰ ਹਸਪਤਾਲ ਲੈ ਜਾਣਾ ਪੈਂਦਾ ਹੈ।
ਸਿਹਤ ਏਜੰਸੀ ਨੇ ਕਿਹਾ ਕਿ ਜੇਕਰ ਕਿਸੇ ਨੇ ਕੈਲੀਫੋਰਨੀਆ ਦੇ ਥਾਮਸਨ ਇੰਟਰਨੈਸ਼ਨਲ ਇੰਕ. ਆਫ ਬੇਕਰਸਫੀਲਡ ਵਲੋਂ ਵੇਚੇ ਗਏ ਪਿਆਜ਼ ਖਰੀਦੇ ਹਨ ਤਾਂ ਉਹ ਇਸ ਨੂੰ ਉਸੇ ਸਮੇਂ ਘਰੋਂ ਬਾਹਰ ਸੁੱਟ ਕੇ ਉਸ ਥਾਂ ਨੂੰ ਚੰਗੀ ਧੋਣ ਅਤੇ ਆਪਣੇ ਹੱਥ ਵੀ ਚੰਗੀ ਤਰ੍ਹਾਂ ਸਾਫ ਕਰਨ। ਜੇਕਰ ਕਿਸੇ ਦੇ ਪਿਆਜ਼ਾਂ ਦੀ ਬੋਰੀ ਉੱਤੇ ਕੋਈ ਬਰਾਂਡ ਦੀ ਪਰਚੀ ਨਹੀਂ ਹੈ ਕਿ ਇਹ ਕਿੱਥੋਂ ਆਏ ਹਨ, ਤਾਂ ਵੀ ਉਹ ਲੋਕ ਵੀ ਪਿਆਜ਼ ਬਾਹਰ ਸੁੱਟ ਦੇਣ ਤੇ ਥੋੜ੍ਹੇ ਦਿਨ ਪਿਆਜ਼ ਨਾ ਖਰੀਦਣ ਤੇ ਨਾ ਖਾਣ। ਜ਼ਿਕਰਯੋਗ ਹੈ ਕਿ ਹੋਟਲ, ਰੈਸਟੋਰੈਂਟਾਂ, ਕੈਫੇਟੇਰੀਆ, ਹਸਪਤਾਲਾਂ ਤੇ ਨਰਸਿੰਗ ਹੋਮਜ਼ ਵਿਚ ਵੀ ਇਹ ਪਿਆਜ਼ ਪੁੱਜ ਚੁੱਕੇ ਹਨ।