ਆਮਿਰ ਖ਼ਾਨ ਦੇ ਪੁਰਾਣੇ ਸਾਥੀ ਆਰ. ਮਾਧਵਨ ਨੂੰ ਵੀ ਹੋਇਆ ਕੋਰੋਨਾ

ਮੁੰਬਈ (ਏਜੰਸੀਆਂ): ਬਾਲੀਵੁੱਡ ਅਦਾਕਾਰ ਆਮਿਰ ਖ਼ਾਨ ਤੋਂ ਬਾਅਦ ਹੁਣ ਆਰ. ਮਾਧਵਨ ਨੂੰ ਵੀ ਕੋਵਿਡ ਪਾਜ਼ੇਟਿਵ ਪਾਇਆ ਗਿਆ ਹੈ। ਅਦਾਕਾਰ ਨੇ ਟਵਿੱਟਰ ’ਤੇ ਪ੍ਰਸ਼ੰਸਕਾਂ ਨੂੰ ਅਪਣੀ ਸਿਹਤ ਬਾਰੇ ਜਾਣਕਾਰੀ ਦਿੱਤੀ ਹੈ। ਮਾਧਵਨ ਨੇ ਸਾਲ 2009 ’ਚ ਰਿਲੀਜ਼ ਹੋਈ ਫ਼ਿਲਮ ‘3 ਇਡੀਅਟਸ’ ਨਾਲ ਅਪਣੀ ਗੱਲ ਨੂੰ ਜੋੜਦਿਆਂ ਕੋਰੋਨਾ ਸਬੰਧੀ ਜਾਣਕਾਰੀ ਦਿੰਦਿਆਂ ਟਵੀਟ ਕੀਤਾ ਹੈ।
ਆਰ. ਮਾਧਵਨ ਨੇ ਫ਼ਿਲਮ ‘3 ਇਡੀਅਟਸ’ ਦੇ ਪੋਸਟਰ ਨਾਲ ਅਪਣੀ ਤੇ ਆਮਿਰ ਖ਼ਾਨ ਦੀ ਤਸਵੀਰ ਸਾਂਝੀ ਕੀਤੀ ਤੇ ਲਿਖਿਆ, ‘ਫ਼ਰਹਾਨ ਨੇ ਰੈਂਚੋ ਨੂੰ ਫ਼ਾਲੋਅ ਕਰਨਾ ਸੀ ਤੇ ਵਾਇਰਸ ਹਮੇਸ਼ਾ ਤੋਂ ਉਨ੍ਹਾਂ ਨੂੰ ਫ਼ਾਲੋਅ ਕਰ ਰਿਹਾ ਸੀ, ਹਾਲਾਂਕਿ ਇਸ ਵਾਰ ਉਸ ਨੇ ਸਾਨੂੰ ਫੜ ਹੀ ਲਿਆ ਪਰ ਆਲ ਇਜ਼ ਵੈੱਲ ਤੇ ਕੋਵਿਡ ਵੀ ਛੇਤੀ ਹੀ ਖੂਹ ’ਚ ਡਿੱਗੇਗਾ। ਹਾਲਾਂਕਿ ਇਹ ਉਹ ਜਗ੍ਹਾ ਹੈ, ਜਿਥੇ ਅਸੀਂ ਨਹੀਂ ਚਾਹੁੰਦੇ ਹਾਂ ਕਿ ਰਾਜੂ ਵੀ ਪਹੁੰਚੇ। ਧਨਵਾਦ ਤੁਹਾਡੇ ਪਿਆਰ ਲਈ। ਮੈਂ ਤੇਜ਼ੀ ਨਾਲ ਠੀਕ ਹੋ ਰਿਹਾ ਹਾਂ।’
ਜ਼ਿਕਰਯੋਗ ਹੈ ਕਿ ਫ਼ਿਲਮ ‘3 ਇਡੀਅਟਸ’ ’ਚ ਆਮਿਰ ਖ਼ਾਨ ਨੇ ਰੈਂਚੋ ਦਾ ਕਿਰਦਾਰ ਨਿਭਾਇਆ ਸੀ ਤੇ ਆਰ. ਮਾਧਵਨ ਫਰਹਾਨ ਦੇ ਕਿਰਦਾਰ ’ਚ ਸਨ। ਸ਼ਰਮਨ ਜੋਸ਼ੀ ਨੇ ਇਸ ਫ਼ਿਲਮ ’ਚ ਰਾਜੂ ਰਸਤੋਗੀ ਦਾ ਕਿਰਦਾਰ ਨਿਭਾਇਆ ਸੀ ਤੇ ਬੋਮਨ ਈਰਾਨੀ ਨੇ ਫ਼ਿਲਮ ’ਚ ਕਾਲਜ ਦੇ ਡੀਨ ਵੀਰੂ ਸਹਸਤਰਬੁੱਧੇ (ਵਾਇਰਸ) ਦਾ ਕਿਰਦਾਰ ਨਿਭਾਇਆ ਸੀ। ਫ਼ਿਲਮ ਦੇ ਕਿਰਦਾਰਾਂ ਨੂੰ ਜੋੜਦਿਆਂ ਹੀ ਆਰ. ਮਾਧਵਨ ਨੇ ਟਵੀਟ ’ਚ ਅਪਣੀ ਗੱਲ ਆਖੀ ਹੈ।