ਨੌਜੁਆਨਾਂ ਦੇ ਗੁਣਾਂ ਨੂੰ ਨਿਖਰਾਣ ਲਈ ਪੇਂਡੂ ਤੇ ਸ਼ਹਿਰੀ ਖੇਤਰਾਂ ਵਿਚ ਖੋਲੇ ਜਾਣਗੇ ਰਿਟੇਲ ਆਊਟਲੇਟ : ਸਹਿਕਾਰਤਾ ਮੰਤਰੀ

ਹਰਿਆਣਾ ਦੇ ਸਹਿਕਾਰਤਾ ਮੰਤਰੀ ਡਾ. ਬਨਵਾਰੀ ਲਾਲ ਨੇ ਕਿਹਾ ਕਿ ਨੌਜੁਆਨਾਂ ਵਿਚ ਉਦਮਸ਼ੀਲਤਾ ਦੇ ਗੁਣਾਂ ਨੂੰ ਨਿਖਰਾਨੇ ਲਈ ਪੇਂਡੂ ਤੇ ਸ਼ਹਿਰੀ ਖੇਤਰਾਂ ਵਿਚ ਰਿਟੇਲ ਆਊਟਲੇਟ ਖੋਲੇ ਜਾਣਗੇ| ਇਸ ਤੋਂ ਇਲਾਵਾ,  ਮਹਿਲਾ ਸਸ਼ਕਤੀਕਰਣ ਨੂੰ ਪ੍ਰੋਤਸਾਹਨ ਦੇਣ ਅਤੇ ਨੌਜੁਆਨਾਂ ਨੂੰ ਪ੍ਰੋਤਸਾਹਿਤ ਕਰਨ ਲਈ ਇਸ ਯੋਜਨਾ ਦੇ ਤਹਿਤ ਫ੍ਰੇਂਚਾਇਜੀ ਪਾਲਿਸੀ ਵਿਚ ਪ੍ਰਵਧਾਨ ਵੀ ਕੀਤਾ ਜਾਵੇਗਾ|
ਉਨਾਂ ਦਸਿਆ ਕਿ ਹਰਿਆਣਾ ਦੇ ਮੁੱਖ ਮੰਤਰੀ ਮਨੋਹਰ ਲਾਲ 11 ਫਰਵਰੀ, 2021 ਨੂੰ ਪੰਡਿਤ ਦੀਨ ਦਯਾਲ ਉਪਾਧਿਏ ਦੀ ਜੈਯੰਤੀ ਦੇ ਮੌਕੇ 'ਤੇ ਰਿਟੇਲ ਅਕਸਪੈਂਸ਼ਨ ਪ੍ਰੋਜੈਕਟ ਦੀ ਸ਼ੁਰੂਆਤ ਕਰਨਗੇ ਅਤੇ ਇਸ ਯੋਜਨਾ ਦੇ ਤਹਿਤ ਸੂਬੇ ਵਿਚ ਪੇਂਡੂ ਖੇਤਰਾਂ ਵਿਚ 1500 ਅਤੇ ਸ਼ਹਿਰੀ ਖੇਤਰਾਂ ਵਿਚ 500 ਰਿਟੇਲ ਆਊਟਲੇਟ ਖੋਲੇ ਜਾਣਗੇ|
ਉਨਾਂ ਦਸਿਆ ਕਿ ਇੰਨਾਂ ਰਿਟੇਲ ਆਊਟਲੇਟ ਵਿਚ ਮੁੱਖ ਤੌਰ 'ਤੇ ਰੋਜਾਨਾ ਦੇ ਉਤਪਾਦ ਤੇ ਖਾਣ ਪਦਾਰਥ ਰੱਖੇ ਜਾਣਗੇ| ਇੰਨਾਂ ਆਊਟਲੇਟ ਵਿਚ 30 ਫੀਸਦੀ ਉਤਪਾਦ ਸਰਕਾਰੀ ਅਦਾਰਿਆਂ ਜਿਵੇਂ ਕਿ ਹੈਫੇਡ,  ਵੀਟਾ,  ਅਮੂਲ,  ਨੈਫੇਡ,  ਖਾਦੀ ਬੋਰਡ,  ਸਵੈ ਸਹਾਇਤ ਸਮੂਹ ਅਤੇ ਕਿਸਾਨ ਉਤਪਾਦਕ ਸੰਗਠਨ ਆਦਿ ਰੱਖੇ ਜਾਣਗੇ| ਇਸ ਤੋਂ ਇਲਾਵਾ, 30 ਫੀਸਦੀ ਉਤਪਾਦ ਹਰਿਆਣਾ ਤੇ ਨੇੜਲੇ ਖੇਤਰ ਦੇ ਛੋਟੇ,  ਮੱਧਰੇ ਤੇ ਸੂਖਮ ਉਦਯੋਗਾਂ ਵੱਲੋਂ ਤਿਆਰ ਉਤਪਾਦ ਰੱਖੇ ਜਾਣਗੇ| ਨਾਲ ਹੀ, 40 ਫੀਸਦੀ ਕੌਮੀ ਤੇ ਕੌਮਾਂਤਰੀ ਪੱਧਰ 'ਤੇ ਮਸ਼ਹੂਰ ਬ੍ਰਾਂਡ ਦੇ ਵੀ ਉਤਪਾਦ ਰੱਖੇ ਜਾਣਗੇ| ਇੰਨਾਂ ਆਊਟਲੇਟ 'ਤੇ ਉੱਚ ਗੁਣਵੱਤਾ ਵਾਲੇ ਉਤਪਾਦ ਹੀ ਰੱਖੇ ਜਾਣਗੇ|
ਉਨਾਂ ਦਸਿਆ ਕਿ ਇੰਨਾਂ ਆਊਟਲੇਟ ਨੂੰ ਸਥਾਪਿਤ ਕਰਨ ਲਈ ਨਿੱਜੀ ਖੇਤਰ ਦੀ ਲਾਜਿਸਿਟਕ ਤੇ ਸਪਲਾਈ ਚੈਨ ਪ੍ਰਬੰਧਨ ਨੂੰ ਸ਼ਾਮਿਲ ਕੀਤਾ ਜਾਵੇਗਾ,  ਜਿਸ ਨਾਲ ਸਾਰੇ ਆਊਟਲੇਟ 'ਤੇ ਇਕ ਬਰਾਬਰੀ ਦੇ ਉੱਚ ਗੁਣਵੱਤਾ ਵਾਲੇ ਉਤਪਾਦਾਂ ਦੀ ਉਪਲੱਬਧਤਾ ਯਕੀਨੀ ਹੋ ਸਕੇਗੀ| ਕੇਂਦੀਰੀਕ੍ਰਿਤ ਆਈ.ਟੀ. ਪ੍ਰਣਾਲੀ ਦੇ ਤਹਿਤ ਸੌ ਫੀਸਦੀ ਕੰਪਿਊਟਰ ਆਪਰੇਟਿਡ ਆਊਟਲੇਟ ਹੋਣਗੇ| ਲੈਣ-ਦੇਣ ਈ-ਬਿਲ ਰਾਹੀਂ ਹੋਵੇਗਾ| ਆਊਟਲੇਟ ਮਾਲਕ ਲਈ ਨੌਜੁਆਨਾਂ ਨੂੰ ਸਰਕਾਰ ਵੱਲੋਂ ਸਿਖਲਾਈ ਵੀ ਦਿੱਤੀ ਜਾਵੇਗੀ| ਸਰਕਾਰ ਦਾ ਮੰਤਵ ਉਤਪਾਦਕ,  ਦੁਕਾਨਦਾਰ ਅਤੇ ਗ੍ਰਾਹਕਾਂ ਨੂੰ ਵੱਧ ਤੋਂ ਵੱਧ ਲਾਭ ਪਹੁੰਚਾਉਣਾ ਹੈ|
ਉਨਾਂ ਦਸਿਆ ਕਿ ਇਸ ਪ੍ਰੋਜੈਕਟ ਦੇ ਸਫਲ ਲਾਗੂਕਰਨ ਲਈ ਹਰਿਆਣਾ ਅਗਰੋ ਇੰਡਸਟ੍ਰੀਜ ਕਾਰਪੋਰੇਸ਼ਨ ਲਿਮਟਿਡ ਦੇ ਤਹਿਤ ਇਕ ਵੱਖਰਾ ਡਿਵੀਜਨ ਸਥਾਪਿਤ ਕੀਤਾ ਗਿਆ ਹੈ ਅਤੇ ਇਸ ਵਿਚ ਅਜਿਹੇ ਮਾਹਿਰਾਂ ਨੂੰ ਸ਼ਾਮਿਲ ਕੀਤਾ ਗਿਆ ਹੈ,  ਜਿੰਨਾਂ ਨੂੰ ਇਸ ਤਰਾਂ ਦੇ ਪ੍ਰੋਜੈਕਟ ਨੂੰ ਚਲਾਉਣ ਦਾ ਲੰਬਾ ਤਜੁਰਬਾ ਹੈ|