ਅਮਰੀਕਾ : ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੂੰ ਯੂ ਏ ਈ ਅਤੇ ਇਜ਼ਰਾਈਲ ਵਿਚਕਰ ਸ਼ਾਂਤੀ ਸਮਝੌਤਾ ਕਰਵਾਉਣ ਦੇ ਮੱਦੇਨਜ਼ਰ ਨੋਬਲ ਪੀਸ ਪ੍ਰਾਈਜ਼ ੨੦੨੧ ਲਈ ਨਾਮਜ਼ਦ ਕੀਤਾ ਗਿਆ ਹੈ। ਜਾਣਕਾਰੀ ਅਨੁਸਾਰ ਨਾਰਵੇ ਪਾਰਲੀਮੈਂਟ ਮੈਂਬਰ ਕ੍ਰਿਸਟੀਨ ਤਿਬਰਿੰਗ ਜੈਦੇ ਨੇ ਨਾਰਥ ਐਟਲੇਂਟਿਕ ਟਰੀਟੀ ਓਰਗੇਨਾਈਜੇਸ਼ਨ (ਨਾਟੋ) ਪਾਰਲੀਮੈਂਟਰੀ ਅਸੇੰਬਲੀ ਨੂੰ ਰਾਸ਼ਟਰਪਤੀ ਟਰੰਪ ਦੇ ਨਾਮ ਦੀ ਸਿਫਾਰਿਸ਼ ਕੀਤੀ ਹੈ।
ਤੁਹਾਨੂੰ ਦੱਸ ਦਈਏ ਕਿ ਤਿਬਰਿੰਗ ਨੇ ਪ੍ਰੈਸ ਕਾਨਫਰੈਂਸ ਜ਼ਰੀਏ ਇਸ ਸਬੰਧੀ ਜਾਣਕਾਰੀ ਸਾਂਝੀ ਕੀਤੀ ਹੈ। ਤਿਬਰਿੰਗ ਨੇ ਕਿਹਾ ਕਿ ਇਹ ਸਮਝੌਤਾ ਆਪਣੇ ਆਪ ਵਿਚ ਵਿਲੱਖਣ ਹੈ ਨਾਲ ਹੀ ਉਹਨਾਂ ਨੇ ਇਹ ਕਿਹਾ ਕਿ ਮੈਂ ਟਰੰਪ ਦਾ ਸਮਰਥਕ ਨਹੀਂ ਹਾਂ ਅਤੇ ਇਹ ਗੱਲ ਏਨੀ ਅਹਿਮ ਨਹੀਂ ਹੈ ਕਿ ਉਹਨਾਂ ਦਾ ਘਰ ਵਿਚ ਵਰਤਾਰਾ ਕਿਹੋ ਜਿਹਾ ਹੈ ਪਰ ਜੋ ਉਹਨਾਂ ਦਾ ਯੋਗਦਾਨ ਇਸ ਸਮਝੌਤੇ ਵਿਚ ਸੀ ਉਹ ਸ਼ਲਾਗਾਯੋਗ ਹੈ ਜਿਸ ਨੂੰ ਨਜ਼ਰਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ। ਤਿਬਰਿੰਗ ਨੇ ਕਮੇਟੀ ਨੂੰ ਅਪੀਲ ਕੀਤੀ ਕਿ ਉਹ ਟਰੰਪ ਦੀ ਅਮਰੀਕੀ ਸਿਆਸਤ ਨੂੰ ਛੱਡ ਕਿ ਆਲਮੀ ਸ਼ਾਂਤੀ ਵਿਚ ਪਾਏ ਉਹਨਾਂ ਦੇ ਯੋਗਦਾਨ ਵੱਲ ਗੌਰ ਕੀਤਾ ਜਾਵੇ। ਦੱਸ ਦਈਏ ਕਿ ਇਹ ਸ਼ਾਂਤੀ ਸਮਝੌਤਾ ਟਰੰਪ ਦੇ ਵ੍ਹਾਈਟ ਹਾਊਸ ਵਿਚ 15 ਸਤੰਬਰ ਨੂੰ ਸਾਈਨ ਹੋਵੇਗਾ। ਇਸ ਦੇ ਨਾਲ ਹੀ ਯੂਏਈ ਪਹਿਲਾ ਗਲਫ ਦੇਸ਼ ਬਣੇਗਾ ਜੋ ਇਜ਼ਰਾਈਲ ਨਾਲ ਸਿੱਧੇ ਤੌਰ ਤੇ ਸਮਝੌਤਾ ਕਰੇਗਾ।