ਨਵੀਂ ਦਿੱਲੀ : ਇਕ ਪਾਸੇ ਜਿਥੇ ਚੀਨ ਦੇ ਉਤਪਾਦਾਂ ਅਤੇ ਕੰਪਨੀਆਂ ਦਾ ਦੇਸ਼ ਭਰ ਵਿਚ ਵਿਰੋਧ ਚਲ ਰਿਹਾ ਹੈ ਉੱਥੇ ਹੀ ਦੂਜੇ ਪਾਸੇ ਬੀ. ਸੀ. ਸੀ. ਆਈ. (ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ) ਨੇ ਸਾਫ਼ ਤੌਰ 'ਤੇ ਕਹਿ ਦਿਤਾ ਹੈ ਕਿ ਉਹ ਆਈ.ਪੀ.ਐਲ. (ਇੰਡੀਅਨ ਪ੍ਰੀਮੀਅਰ ਲੀਗ) ਦੇ ਸਪਾਂਸਰ ਵੀਵੋ ਨਾਲ ਕਰਾਰ ਨਹੀਂ ਖ਼ਤਮ ਕਰੇਗਾ। ਬੀ. ਸੀ. ਸੀ. ਆਈ. ਨੇ ਕਿਹਾ ਹੈ ਕਿ ਉਹ ਅਗਲੇ ਦੌਰ ਲਈ ਅਪਣੀ ਸਪਾਂਸਰ ਨੀਤੀ ਦੀ ਸਮੀਖਿਆ ਲਈ ਤਿਆਰ ਹੈ ਪਰ ਉਸ ਦਾ ਆਈ. ਪੀ. ਐਲ. ਦੇ ਮੌਜੂਦਾ ਟਾਈਟਲ ਸਪਾਂਸਰ ਵੀਵੋ (ਚੀਨ ਦੀ ਮੋਬਾਈਲ ਕੰਪਨੀ) ਨਾਲ ਕਰਾਰ ਖ਼ਤਮ ਕਰਨ ਦਾ ਕੋਈ ਇਰਾਦਾ ਨਹੀਂ ਹੈ, ਨਾਲ ਹੀ ਬੋਰਡ ਦੇ ਖ਼ਜ਼ਾਨਚੀ ਅਰੁਣ ਧੂਮਲ ਦਾ ਕਹਿਣਾ ਹੈ ਕਿ ਆਈ.ਪੀ.ਐਲ. ਨਾਲ ਚੀਨੀ ਕੰਪਨੀਆਂ ਤੋਂ ਆ ਰਹੇ ਪੈਸੇ ਨਾਲ ਭਾਰਤ ਨੂੰ ਹੀ ਫ਼ਾਇਦਾ ਹੋ ਰਿਹਾ ਹੈ, ਚੀਨ ਨੂੰ ਨਹੀਂ। ਧੂਮਲ ਨੇ ਕਿਹਾ ਕਿ ਜ਼ਜ਼ਬਾਤੀ ਤੌਰ 'ਤੇ ਗੱਲ ਕਰਨ ਨਾਲ ਤਰਕ ਨਾਲ ਤਰਕ ਪਿੱਛੇ ਰਹਿ ਜਾਂਦਾ ਹੈ। ਸਾਨੂੰ ਸਮਝਣਾ ਹੋਵੇਗਾ ਕਿ ਅਸੀਂ ਚੀਨ ਦੇ ਹਿੱਤ ਲਈ ਚੀਨੀ ਕੰਪਨੀਆਂ ਦੇ ਸਹਿਯੋਗ ਦੀ ਗੱਲ ਕਰ ਰਹੇ ਹਾਂ ਜਾਂ ਭਾਰਤ ਦੇ ਹਿੱਤ ਦੇ ਲਈ ਚੀਨੀ ਕੰਪਨੀਆਂ ਤੋਂ ਮਦਦ ਲੈ ਰਹੇ ਹਾਂ। ਉਸ ਨੇ ਕਿਹਾ ਕਿ ਜਦੋਂ ਅਸੀਂ ਭਾਰਤ ਵਿਚ ਚੀਨੀ ਕੰਪਨੀਆਂ ਨੂੰ ਉਸ ਦੇ ਉਤਪਾਦ ਵੇਚਣ ਦੀ ਇਜਾਜ਼ਤ ਦਿੰਦੇ ਹਾਂ ਤਾਂ ਜੋ ਵੀ ਪੈਸਾ ਉਹ ਭਾਰਤੀ ਉਪਭੋਗਤਾ ਤੋਂ ਲੈ ਰਹੇ ਹਨ, ਉਸ ਵਿਚੋਂ ਕੁੱਝ ਬੀ. ਸੀ. ਸੀ. ਆਈ. ਨੂੰ ਬ੍ਰਾਂਡ ਪ੍ਰਚਾਰ ਦੇ ਲਈ ਦੇ ਰਹੇ ਹਨ ਅਤੇ ਬੋਰਡ ਭਾਰਤ ਸਰਕਾਰ ਨੂੰ 42 ਫ਼ੀ ਸਦੀ ਟੈਕਸ ਦੇ ਰਿਹਾ ਹੈ। ਇਸ ਲਈ ਭਾਰਤ ਦਾ ਫ਼ਾਇਦਾ ਹੋ ਰਿਹਾ ਹੈ, ਚੀਨ ਦਾ ਨਹੀਂ।