ਕੋਲਕਾਤਾ : ਪਿਆਰ ’ਚ ਅੰਨ੍ਹੀ ਹੋਈ ਇੱਕ 22 ਸਾਲ ਦੀ ਕੁੜੀ ਆਪਣੇ ਪ੍ਰੇਮੀ ਨੂੰ ਮਿਲਣ ਲਈ ਬੰਗਲਾਦੇਸ਼ ਤੋਂ ਤੈਰ ਕੇ ਭਾਰਤ ਪੁੱਜ ਗਈ। ਡੂੰਘੇ ਪਾਣੀ ਤੇ ਜੰਗਲੀ ਜਾਨਵਰਾਂ ਦੀ ਪ੍ਰਵਾਹ ਕੀਤੇ ਬਿਨਾ ਉਸ ਨੇ ਸੁੰਦਰਬਨ ਡੈਲਟਾ ਨੂੰ ਪਾਰ ਕੀਤਾ ਅਤੇ ਪੱਛਮੀ ਬੰਗਾਲ ਆ ਗਈ।
ਇੱਥੇ ਪੁੱਜ ਕੇ ਉਸ ਨੇ ਆਪਣੇ ਪ੍ਰੇਮੀ ਨਾਲ ਵਿਆਹ ਕਰਾ ਲਿਆ, ਪਰ ਹੁਣ ਭਾਰਤੀ ਪੁਲਿਸ ਨੇ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ ਤੇ ਬੰਗਲਾਦੇਸ਼ ਵਾਪਸ ਭੇਜਣ ਦੀ ਤਿਆਰੀ ਕੀਤੀ ਜਾ ਰਹੀ ਹੈ। ਕ੍ਰਿਸ਼ਨਾ ਮੰਡਲ ਦੀ ਕੁਝ ਸਮਾਂ ਪਹਿਲਾਂ ਫੇਸਬੁਕ ਰਾਹੀਂ ਭਾਰਤ ਵਿੱਚ ਰਹਿਣ ਵਾਲੇ ਆਸ਼ਿਕ ਮੰਡਲ ਨਾਲ ਦੋਸਤੀ ਹੋਈ ਸੀ, ਜੋ ਪਿਆਰ ਵਿੱਚ ਬਦਲ ਗਈ। ਫਿਰ ਉਨ੍ਹਾਂ ਦੋਵਾਂ ਨੇ ਵਿਆਹ ਕਰਾਉਣ ਦਾ ਫ਼ੈਸਲਾ ਕਰ ਲਿਆ, ਪਰ ਕ੍ਰਿਸ਼ਨਾ ਕੋਲ ਪਾਸਪੋਰਟ ਨਹੀਂ ਸੀ। ਇਸ ਲਈ ਉਹ ਕਾਨੂੰਨੀ ਢੰਗ ਨਾਲ ਭਾਰਤ ’ਚ ਦਾਖ਼ਲ ਨਹੀਂ ਹੋ ਸਕਦੀ ਸੀ।