ਚੇਨਈ (ਏਜੰਸੀ): ਅੱਜ ਆਈ.ਪੀ.ਐਲ ਦਾ 14ਵਾਂ ਮੈਚ ਪੰਜਾਬ ਤੇ ਹੈਦਰਾਬਾਦ ਵਿਚਕਾਰ ਖੇਡਿਆ ਗਿਆ। ਪੰਜਾਬ ਨੇ ਟਾਸ ਜਿੱਤ ਕੇ ਪਹਿਲਾਂ ਬੱਲੇਬਾਜ਼ੀ ਕਰਨ ਦਾ ਫ਼ੈਸਲਾ ਲਿਆ ਗਿਆ। ਪੰਜਾਬ ਨੇ ਹੈਦਰਾਬਾਦ ਦੀ ਟੀਮ ਅੱਗੇ 121 ਦੌੜਾਂ ਦਾ ਟੀਚਾ ਰਖਿਆ ਸੀ ਪਰ ਹੈਦਰਾਬਾਦ ਦੀ ਟੀਮ ਨਿਰਧਾਰਤ 18.4 ਓਵਰਾਂ ’ਚ 1 ਵਿਕਟ ਗਵਾ ਕੇ ਹਾਸਲ ਕਰ ਲਿਆ। ਇਸ ਤਰ੍ਹਾਂ ਹੈਦਰਾਬਾਦ ਨੇ ਪੰਜਾਬ ਦੀ ਟੀਮ ਨੂੰ 9 ਵਿਕਟਾਂ ਨਾਲ ਹਰਾ ਦਿਤਾ।
ਇਸ ਤੋਂ ਪਹਿਲਾਂ ਜਿਵੇਂ ਹੀ ਪੰਜਾਬ ਦੀ ਟੀਮ ਬੱਲੇਬਾਜ਼ੀ ਕਰਨ ਉਤਰੀ ਤਾਂ ਉਸ ਨੂੰ ਸ਼ੁਰੂ ਵਿਚ ਹੀ ਝਟਕੇ ਲੱਗਣੇ ਸ਼ੁਰੂ ਹੋ ਗਏ। ਪਹਿਲੇ 8.4 ਓਵਰਾਂ ਵਿਚ 47 ਦੌੜਾਂ ਦੇ ਅੰਦਰ-ਅੰਦਰ ਪੰਜਾਬ ਨੇ ਅਪਣੇ ਪਹਿਲੇ ਚਾਰ ਬੱਲੇਬਾਜ਼ ਗਵਾ ਦਿਤੇ ਸਨ। ਇਨ੍ਹਾਂ ਵਿਚੋਂ ਰਾਹੁਲ ਨੇ 4, ਮੈਯੰਕ ਅਗਰਵਾਲ ਨੇ 22, ਕ੍ਰਿਸ ਗੇਲ ਨੇ 15 ਤੇ ਪੂਰਨ ਨਿਕੋਲਸ ਨੇ 0 ਦੌੜਾਂ ਬਣਾਈਆਂ। ਇਸ ਤਰ੍ਹਾਂ ਪੰਜਾਬ ਦੀ ਟੀਮ 14ਵੇਂ ਓਵਰ ਤਕ ਪਹੁੰਚਦੀ ਪਹੁੰਚਦੀ ਅਪਣੇ 6 ਵਿਕਟਾਂ ਖੋ ਚੁਕੀ ਸੀ ਤੇ ਉਸ ਨੇ ਕੇਵਲ 84 ਦੌੜਾਂ ਬਣਾਈਆਂ ਸਨ। ਇਸ ਤੋਂ ਪਿਛੋਂ ਸ਼ਾਹਰੁਖ਼ ਖ਼ਾਨ ਨੇ ਪਾਰੀ ਨੂੰ ਸੰਭਾਲਣ ਦੀ ਕੋਸ਼ਿਸ਼ ਕੀਤੀ ਪਰ ਉਹ 22 ਦੌੜਾਂ ਬਣਾ ਕੇ ਆਊਟ ਹੋ ਗਿਆ। ਇਸ ਤੋਂ ਬਾਅਦ ਵਾਲੇ ਬੱਲੇਬਾਜ਼ ਬਹੁਤਾ ਦਮ ਨਾ ਦਿਖਾ ਸਕੇ ਤੇ ਪੂਰੀ ਟੀਮ 19.4 ਓਵਰਾਂ ਵਿਚ 120 ਦੌੜਾਂ ਬਣਾ ਕੇ ਆਊਟ ਹੋ ਗਈ।
ਟੀਚੇ ਦਾ ਪਿਛਾ ਕਰਦੀ ਹੈਦਰਾਬਾਦ ਦੀ ਟੀਮ ਦੀ ਸ਼ੁਰੂਆਤ ਧਮਾਕੇਦਾਰ ਰਹੀ ਤੇ ਉਸ ਦੀ ਪਹਿਲੀ ਵਿਕਟ ਵਾਰਨਰ ਦੇ ਰੂਪ ’ਚ 73 ਦੇ ਸਕੋਰ ’ਤੇ ਡਿੱਗੀ ਤੇ ਇਸ ਤੋਂ ਪਿਛੋਂ ਜਾਨੀ ਬਾਰਸਟੋ ਤੇ ਕੇਨ ਵਿਲੀਅਮਸਨ ਨੇ ਟੀਚੇ ਨੂੰ ਅਸਾਨੀ ਨਾਲ ਪੂਰਾ ਕਰ ਲਿਆ।