ਦੀਆ ਮਿਰਜ਼ਾ ਨਾਲ ਵਿਆਹ ਤੋਂ ਬਾਅਦ ਵੈਭਵ ਰੇਖੀ ਦੀ ਪਹਿਲੀ ਪਤਨੀ ਨੇ ਦਿਤੀਆਂ ਵਧਾਈਆਂ 😍

ਮੁੰਬਈ (ਏਜੰਸੀਆਂ): ਉਂਝ ਦੇਖਿਆ ਜਾਂਦਾ ਹੈ ਕਿ ਔਰਤ ਸੌਂਕਣ ਨੂੰ ਕਦੇ ਵੀ ਬਰਦਾਸ਼ਤ ਨਹੀਂ ਕਰਦੀ ਪਰ ਬਾਲੀਵੁੱਡ ਅੰਦਰ ਅਜਿਹਾ ਰਿਵਾਜ ਸ਼ਾਇਦ ਘਟ ਰਿਹਾ ਹੈ ਇਸੇ ਲਈ ਸੁਨੈਨਾ ਰੇਖੀ ਜੋ ਕਿ ਵੈਭਵ ਰੇਖੀ ਦੀ ਪਹਿਲੀ ਪਤਨੀ ਹੈ, ਨੇ ਦੀਆ ਮਿਰਜ਼ਾ ਤੇ ਅਪਣੇ ਪਤੀ ਵੈਭਵ ਨੂੰ ਵਿਆਹ ਦੀ ਮੁਬਾਰਕਵਾਦ ਵੀ ਦਿਤੀ ਹੈ। ਦੀਆ ਮਿਰਜ਼ਾ ਨੇ 15 ਫ਼ਰਵਰੀ ਨੂੰ ਦੂਸਰਾ ਵਿਆਹ ਕਰਵਾਇਆ ਹੈ। ਦੀਆ ਮਿਰਜ਼ਾ ਨੇ ਬਿਜ਼ਨਸਮੈਨ ਵੈਭਵ ਰੇਖੀ ਨਾਲ ਹਿੰਦੂ ਰੀਤੀ-ਰਿਵਾਜ਼ਾ ਨਾਲ ਸੱਤ ਫੇਰੇ ਲਏ ਹਨ। ਵੈਭਵ ਰੇਖੀ ਦਾ ਵੀ ਦੀਆ ਮਿਰਜ਼ਾ ਨਾਲ ਦੂਜਾ ਵਿਆਹ ਹੈ। ਹੁਣ ਉਨ੍ਹਾਂ ਦੇ ਦੂਜੇ ਵਿਆਹ ਨੂੰ ਲੈ ਕੇ ਵੈਭਵ ਦੀ ਪਹਿਲੀ ਪਤਨੀ ਸੁਨੈਨਾ ਰੇਖੀ ਨੇ ਆਪਣੀ ਪ੍ਰਤੀਕਿਰਿਆ ਦਿੱਤੀ ਹੈ।

ਸੁਨੈਨਾ ਨੇ ਦੀਆ ਮਿਰਜ਼ਾ ਤੇ ਵੈਭਵ ਰੇਖੀ ਨੂੰ ਉਨ੍ਹਾਂ ਦੇ ਦੂਜੇ ਵਿਆਹ ’ਤੇ ਵਧਾਈ ਦਿੱਤੀ ਹੈ। ਉਸ ਨੇ ਇਨ੍ਹਾਂ ਦੋਵਾਂ ਨੂੰ ਸੋਸ਼ਲ ਮੀਡੀਆ ਜ਼ਰੀਏ ਵਧਾਈ ਦਿੱਤੀ ਹੈ। ਅੰਗਰੇਜ਼ੀ ਵੈੱਬਸਾਈਟ ਬਾਲੀਵੁੱਡ ਲਾਈਫ ਦੀ ਖ਼ਬਰ ਅਨੁਸਾਰ ਸੁਨੈਨਾ ਰੇਖੀ ਨੇ ਆਪਣੇ ਅਧਿਕਾਰਤ ਇੰਸਟਾਗ੍ਰਾਮ ਅਕਾਊਂਟ ’ਤੇ ਦੀਆ ਮਿਰਜ਼ਾ ਤੇ ਵੈਭਵ ਰੇਖੀ ਲਈ ਲੰਬੀ-ਚੌੜੀ ਪੋਸਟ ਲਿਖੀ ਹੈ। ਇਸ ਪੋਸਟ ਜ਼ਰੀਏ ਉਸ ਨੇ ਵਧਾਈ ਦਿੱਤੀ ਹੈ।
ਸੁਨੈਨਾ ਨੇ ਆਪਣੀ ਪੋਸਟ ’ਚ ਲਿਖਿਆ ਕਿ ਹਾਂ, ਮੇਰੇ ਪਹਿਲੇ ਪਤੀ ਨੇ ਦੀਆ ਨਾਲ ਵਿਆਹ ਕਰਵਾਇਆ ਹੈ। ਮੈਨੂੰ ਕਈ ਮੈਸੇਜ ਆ ਰਹੇ ਹਨ, ਜਿਸ ’ਚ ਲੋਕ ਪੁੱਛ ਰਹੇ ਹਨ ਕਿ ਕੀ ਮੈਂ ਤੇ ਸਮਾਇਰਾ (ਸੁਨੈਨਾ ਦੀ ਬੇਟੀ) ਠੀਕ ਹੈ? ਸਭ ਤੋਂ ਪਹਿਲਾਂ ਤਾਂ ਮੈਂ ਸਾਰਿਆਂ ਦਾ ਧੰਨਵਾਦ ਕਰਦੀ ਹਾਂ ਕਿ ਤੁਸੀਂ ਲੋਕਾਂ ਨੇ ਮੈਨੂੰ ਆਪਣਾ ਸਮਝਿਆ ਤੇ ਫ਼ਿਕਰ ਕੀਤੀ। ਉਸ ਨੇ ਖ਼ੁਸ਼ੀ ਜ਼ਾਹਿਰ ਕੀਤੀ ਕਿ ਉਸ ਦੀ ਬੇਟੀ ਇਸ ਖ਼ਾਸ ਮੌਕੇ ਦਾ ਹਿੱਸਾ ਬਣ ਸਕੀ। ਅਸੀਂ ਬਿਲਕੁਲ ਠੀਕ ਹਾਂ। ਨਾ ਸਿਰਫ਼ ਠੀਕ ਹਾਂ ਸਗੋਂ ਮੇਰੀ ਬੇਟੀ ਬਹੁਤ ਉਤਸ਼ਾਹਿਤ ਹੈ। ਮੈਂ ਕੁਝ ਵੀਡੀਓ ਦੇਖੀਆਂ, ਜਿਨ੍ਹਾਂ ’ਚ ਉਹ ਫੁੱਲ ਸੁੱਟ ਰਹੀ ਸੀ।