ਨਵੀਂ ਦਿੱਲੀ (ਏਜੰਸੀਆਂ) : ਇੰਗਲੈਂਡ ਦੇ ਤੇਜ਼ ਗੇਂਦਬਾਜ਼ ਮਾਰਕ ਵੁੱਡ ਨੇ ਅੱਜ ਚੇਨਈ ਵਿੱਚ ਹੋਣ ਜਾ ਰਹੀ ਇੰਡੀਅਨ ਪ੍ਰੀਮੀਅਰ ਲੀਗ (IPL) 2021 ਦੀ ਪਲੇਅਰ ਆਕਸ਼ਨ ਤੋਂ ਆਪਣਾ ਨਾਮ ਵਾਪਸ ਲੈ ਲਿਆ ਹੈ। ਫਰੈਂਚਾਇਜ਼ੀਆਂ ਨੂੰ ਬੁੱਧਵਾਰ ਨੂੰ ਚੇਨਈ ਵਿੱਚ ਇੱਕ ਬ੍ਰੀਫਿੰਗ ਵਿੱਚ ਦੱਸਿਆ ਗਿਆ ਕਿ ਵੁੱਡ ਨੇ ਆਪਣੇ ਪਰਿਵਾਰ ਨਾਲ ਸਮਾਂ ਬਿਤਾਉਣ ਲਈ ਨਿਲਾਮੀ ਤੋਂ ਬਾਹਰ ਜਾਣ ਦਾ ਫੈਸਲਾ ਕੀਤਾ ਹੈ।
ਵੁੱਡ ਨੇ ਇਸ ਨਿਲਾਮੀ ਵਿੱਚ ਆਪਣੀ ਬੇਸ ਕੀਮਤ 2 ਕਰੋੜ ਰੁਪਏ ਰੱਖੀ ਸੀ। ਵੁਡ ਅੱਠ ਵਿਦੇਸ਼ੀ ਖਿਡਾਰੀਆਂ ਵਿੱਚੋਂ ਇੱਕ ਸਨ ਜੋ ਸਭ ਤੋਂ ਵੱਧ ਬਰੈਕਟ ਵਿੱਚ ਰੱਖਣ ਲਈ ਚੁਣੇ ਗਏ ਸਨ।
ਦੱਸ ਦੇਈਏ ਕਿ IPL ਦੇ ਅਗਲੇ ਸੀਜ਼ਨ ਲਈ ਅੱਜ ਕੁਲ 292 ਖਿਡਾਰੀਆਂ ਦੀ ਨਿਲਾਮੀ ਹੋਣ ਜਾ ਰਹੀ ਹੈ। ਇਸ ਵਿਚੋਂ 164 ਭਾਰਤੀ ਅਤੇ 125 ਵਿਦੇਸ਼ੀ ਹਨ। ਨਿਲਾਮੀ ਵਿੱਚ ਤਿੰਨ ਸਹਿਯੋਗੀ ਖਿਡਾਰੀ ਵੀ ਹੋਣਗੇ। ਸਾਰੀਆਂ ਅੱਠ ਫ੍ਰੈਂਚਾਇਜ਼ੀ ਆਪਣੇ 61 ਸਲੋਟਾਂ ਨੂੰ ਭਰਨ ਲਈ ਨਿਲਾਮੀ ਵਿੱਚ ਦਾਖਲ ਹੋਣਗੀਆਂ।