ਕੰਨੌਜ (ਯੂ. ਪੀ.) : ਭਾਜਪਾ ਦੀ ਦਿੱਲੀ ਇਕਾਈ ਦੇ ਬੁਲਾਰੇ ਸੰਦੀਪ ਸ਼ੁਕਲਾ ਅਤੇ ਉਸ ਦੀ ਪਤਨੀ ਅਨੀਤਾ ਦੀ ਐਤਵਾਰ ਸਵੇਰੇ ਐਕਸਪ੍ਰੈਸਵੇਅ 'ਤੇ ਠਠਿਆ ਨੇੜੇ ਸੜਕ ਹਾਦਸੇ ਵਿਚ ਮੌਤ ਹੋ ਗਈ। ਜਾਣਕਾਰੀ ਅਨੁਸਾਰ ਉਹ ਪਰਵਾਰ ਨਾਲ ਵਿਆਹ ਸਮਾਗਮ ਲਈ ਪ੍ਰਤਾਪਗੜ੍ਹ ਜਾ ਰਹੇ ਸਨ।
ਨਵੀਂ ਦਿੱਲੀ ਦੀ ਸੰਗਮ ਵਿਹਾਰ ਵਿਚ ਰਹਿਣ ਵਾਲੇ ਭਾਜਪਾ ਬੁਲਾਰੇ ਸੰਦੀਪ ਸ਼ੁਕਲਾ (45) ਅਤੇ ਉਨ੍ਹਾਂ ਦੀ ਪਤਨੀ ਅਨੀਤਾ ਸ਼ੁਕਲਾ (42) ਪਰਵਾਰ ਸਣੇ ਵਿਆਹ ਸਮਾਗਮ ਵਿਚ ਸ਼ਾਮਲ ਹੋਣ ਲਈ ਪ੍ਰਤਾਪਗੜ੍ਹ ਜਾ ਰਹੇ ਸਨ, ਤਾਂ ਠਠਿਆ ਦੇ ਕੱਟ ਨੇੜੇ ਇਕ ਟਰੱਕ ਨੇ ਕਾਰ ਨੂੰ ਪਿੱਛੇ ਤੋਂ ਟੱਕਰ ਮਾਰ ਦਿਤੀ।
ਹਾਦਸੇ ਵਿਚ ਕਾਰ ਸਵਾਰ ਸ਼ੁਕਲਾ ਤੇ ਉਨ੍ਹਾਂ ਦੀ ਪਤਨੀ ਅਨੀਤਾ ਸ਼ੁਕਲਾ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਉਥੇ ਹੀ ਉਨ੍ਹਾਂ ਦੇ ਬੇਟੇ ਸਿਧਾਰਥ ਸ਼ੁਕਲਾ (10), ਅਭਿਨਵ ਸ਼ੁਕਲਾ (6) ਅਤੇ ਆਰਵ ਸ਼ੁਕਲਾ (3) ਅਤੇ ਗੁਆਂਢੀ ਅਮਿਤ ਕੁਮਾਰ (19) ਅਤੇ ਆਰੀਅਨ ਸ਼ਰਮਾ (23) ਜ਼ਖ਼ਮੀ ਹੋ ਗਏ। ਜ਼ਖ਼ਮੀਆਂ ਨੂੰ ਮੈਡੀਕਲ ਕਾਲਜ ਵਿਖੇ ਦਾਖ਼ਲ ਕਰਵਾਇਆ ਗਿਆ ਹੈ।