ਸੀਤਾਪੁਰ : ਉਤਰ ਪ੍ਰਦੇਸ਼ ਦੇ ਸੀਤਾਪੁਰ ਜ਼ਿਲ੍ਹੇ ਦੇ ਮਹੌਲੀ 'ਚ ਸੇਵਾ ਮੁਕਤ ਅਧਿਆਪਕ ਦੀ ਮੰਦਰ ਕੰਪਲੈਕਸ ਅੰਦਰ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕਰ ਕੇ ਕਤਲ ਕਰ ਦਿਤਾ ਗਿਆ। ਸੀਤਾਪੁਰ ਦੇ ਪੁਲਸ ਅਧਿਕਾਰੀ ਆਰ. ਪੀ. ਸਿੰਘ ਨੇ ਦਸਿਆ ਕਿ ਥਾਣਾ ਮਹੌਲੀ ਦੇ ਸੋਨਾਰਣ ਟੋਲਾ ਵਿਚ ਰਹਿਣ ਵਾਲੇ ਸੇਵਾ ਮੁਕਤ ਅਧਿਆਪਕ ਕਮਲੇਸ਼ ਚੰਦਰ ਮਿਸ਼ਰਾ (68) ਸ਼ੁਕਰਵਾਰ ਸ਼ਾਮ ਨੂੰ ਪਿੰਡ ਤੋਂ ਬਾਹਰ ਬਣੇ ਮੰਦਰ ਵਿਚ ਪੂਜਾ ਕਰਨ ਗਏ ਸਨ। ਰਾਤ ਕਰੀਬ 12.00 ਵਜੇ ਤਕ ਵਾਪਸ ਨਹੀਂ ਆਏ ਤਾਂ ਪਰਵਾਰ ਵਾਲਿਆਂ ਨੇ ਜਾ ਕੇ ਦੇਖਿਆ ਤਾਂ ਮੰਦਰ ਨੇੜੇ ਡਿੱਗੇ ਹੋਏ ਸਨ। ਉਨ੍ਹਾਂ ਦੇ ਸਰੀਰ 'ਤੇ ਤੇਜ਼ਧਾਰ ਹਥਿਆਰਾਂ ਨਾਲ ਸੱਟਾਂ ਮਾਰਨ ਦੇ ਨਿਸ਼ਾਨ ਸਨ। ਅਧਿਆਪਕ ਨੂੰ ਤੁਰੰਤ ਹਸਪਤਾਲ ਲਿਜਾਇਆ ਗਿਆ ਅਤੇ ਰਾਹ ਵਿਚ ਹੀ ਉਨ੍ਹਾਂ ਨੇ ਦਮ ਤੋੜ ਦਿੱਤਾ। ਪੁਲਸ ਨੇ ਪਰਿਵਾਰ ਵਾਲਿਆਂ ਵਲੋਂ ਦਿਤੀ ਸ਼ਿਕਾਇਤ ਦੇ ਆਧਾਰ 'ਤੇ ਮੁਕੱਦਮਾ ਦਰਜ ਕਰ ਲਿਆ ਹੈ। ਉਨ੍ਹਾਂ ਨੇ ਦੱਸਿਆ ਕਿ ਐਡੀਸ਼ਨਲ ਪੁਲਸ ਸੁਪਰਡੈਂਟ ਉਤਰੀ ਅਤੇ ਖੇਤਰਾਧਿਕਾਰੀ ਸਦਰ ਦੀ ਅਗਵਾਈ 'ਚ 4 ਟੀਮਾਂ ਦਾ ਗਠਨ ਕਰ ਕੇ ਕੇਸ ਦੀ ਜਾਂਚ ਸ਼ੁਰੂ ਕਰ ਦਿਤੀ ਗਈ ਹੈ ਅਤੇ ਹੁਣ ਤਕ ਦੀ ਜਾਂਚ 'ਚ ਇਹ ਦੇਖਿਆ ਗਿਆ ਹੈ ਕਿ ਘਟਨਾ 'ਚ ਤੰਤਰ ਮੰਤਰ ਇਕ ਕਾਰਨ ਹੋ ਸਕਦਾ ਹੈ।