ਦੇਸ਼, 13 ਅਗਸਤ 2026: ਸੰਸਦ ਦੇ ਮਾਨਸੂਨ ਸੈਸ਼ਨ ਦੀ ਸਮਾਪਤੀ ਤੋਂ ਬਾਅਦ, ਕੇਂਦਰੀ ਸੰਸਦੀ ਮਾਮਲਿਆਂ ਦੇ ਮੰਤਰੀ ਕਿਰੇਨ ਰਿਜੀਜੂ ਨੇ ਕਿਹਾ ਕਿ ਇਸ ਸੈਸ਼ਨ ਦੌਰਾਨ ਰਾਜ ਸਭਾ ਦਾ ਕੰਮਕਾਜ 39% ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਵਿਰੋਧੀ ਧਿਰ ਦੇ ਸੰਸਦ ਮੈਂਬਰਾਂ ਨੇ ਰਾਜ ਸਭਾ ‘ਚ ਹੰਗਾਮਾ ਕੀਤਾ, ਕਈ ਵਾਰ ਤਾਂ ਸਦਨ ਤੋਂ ਵਾਕਆਊਟ ਵੀ ਕਰ ਦਿੱਤਾ।
ਰਿਜੀਜੂ ਨੇ ਕਿਹਾ ਕਿ ਇਸ ਦੇ ਬਾਵਜੂਦ, ਜ਼ਿਆਦਾਤਰ ਹੋਰ ਰਾਸ਼ਟਰੀ ਲੋਕਤੰਤਰੀ ਗਠਜੋੜ (ਐਨਡੀਏ) ਪਾਰਟੀਆਂ ਅਤੇ ਕੁਝ ਵਿਰੋਧੀ ਪਾਰਟੀਆਂ ਦੇ ਸੰਸਦ ਮੈਂਬਰਾਂ ਨੇ ਬਹਿਸਾਂ ਅਤੇ ਵਿਚਾਰ-ਵਟਾਂਦਰੇ ‘ਚ ਹਿੱਸਾ ਲਿਆ। ਲੋਕ ਸਭਾ ‘ਚ ਕੰਮਕਾਜ ਸਿਰਫ 19% ਰਿਹਾ। ਰਿਜੀਜੂ ਨੇ ਕਿਹਾ ਕਿ ਲੋਕ ਸਭਾ ‘ਚ 12 ਬਿੱਲ ਪਾਸ ਹੋਏ ਅਤੇ ਸਿਰਫ਼ ਇੱਕ ‘ਤੇ ਚਰਚਾ ਹੋਈ, ਜਦੋਂ ਕਿ ਸਾਰੇ ਬਿੱਲਾਂ ‘ਤੇ ਰਾਜ ਸਭਾ ‘ਚ ਚਰਚਾ ਹੋਈ।
ਰਿਜੀਜੂ ਨੇ ਕਿਹਾ ਕਿ ਇਸ ਸੈਸ਼ਨ ਦੌਰਾਨ ਲੋਕ ਸਭਾ ‘ਚ ਸਿਰਫ਼ ਇੱਕ ਬਿੱਲ ‘ਤੇ ਪੂਰੀ ਤਰ੍ਹਾਂ ਚਰਚਾ ਹੋਈ। ਇਹ ਬਿੱਲ ਪਬਲਿਕ ਪ੍ਰੀਖਿਆਵਾਂ (ਅਨਉਚਿਤ ਅਭਿਆਸਾਂ ਦੀ ਰੋਕਥਾਮ) ਸੋਧ ਬਿੱਲ, 2026 ਸੀ, ਜੋ ਪਬਲਿਕ ਪ੍ਰੀਖਿਆਵਾਂ ‘ਚ ਪੇਪਰ ਲੀਕ ਅਤੇ ਹੋਰ ਅਨੁਚਿਤ ਅਭਿਆਸਾਂ ਨੂੰ ਰੋਕਣ ਦੀ ਕੋਸ਼ਿਸ਼ ਕਰਦਾ ਹੈ। ਇਸ ਸੋਧ ਬਿੱਲ ਦਾ ਉਦੇਸ਼ ਪੇਪਰ ਲੀਕ, ਪ੍ਰੀਖਿਆਵਾਂ ‘ਚ ਸੰਗਠਿਤ ਧੋਖਾਧੜੀ ਅਤੇ ਹੋਰ ਗਲਤ ਕੰਮਾਂ ਵਿਰੁੱਧ ਕਾਨੂੰਨੀ ਪ੍ਰਬੰਧਾਂ ਨੂੰ ਸਖ਼ਤ ਕਰਨਾ ਹੈ। ਇਹ ਮੌਜੂਦਾ 2024 ਦੇ ਕਾਨੂੰਨ ‘ਚ ਸੋਧ ਕਰਦਾ ਹੈ। ਸੰਸਦ ਨੇ ਜੁਲਾਈ ਦੇ ਅਖੀਰ ‘ਚ ਬਿੱਲ ਨੂੰ ਮਨਜ਼ੂਰੀ ਦੇ ਦਿੱਤੀ।