ਨਿਊ ਸਾਊਥ ਵੇਲਜ਼ ਵਿੱਚ ਸਵਾ ਤਿੰਨ ਸੌ ਤਕ ਪੁੱਜੇ ਕੋਰੋਨਾ ਮਾਮਲੇ, ਨਵੀਂ ਤਾਲਾਬੰਦੀ
ਨਿਊ ਸਾਊਥ ਵੇਲਜ਼ : ਬੀਤੇ 24 ਘੰਟਿਆਂ ਦੌਰਾਨ ਰਾਜ ਵਿਚ ਕੋਰੋਨਾ ਦੇ ਨਵੇਂ 319 ਮਾਮਲੇ ਮਿਲੇ ਹਨ। ਇਥੇ ਇਹ ਵੀ ਪਤਾ ਲੱਗਾ ਹੈ ਕਿ ਹੁਣ ਤਕ 5 ਜਣਿਆਂ ਦੀ ਮੌਤ ਹੋ ਗਈ ਹੈ। ਨਵੇਂ ਮਾਮਲਿਆਂ ਵਿੱਚ 194 ਕੋਰੋਨਾ ਕੇਸਾਂ ਦੇ ਸ੍ਰੋਤਾਂ ਦਾ ਪਤਾ ਨਹੀਂ ਲੱਗ ਸਕਿਆ ਹੈ ਅਤੇ ਇਸ ਤੋਂ ਇਲਾਵਾ 83 ਨਾਗਰਿਕ ਸਮਾਜਿਕ ਤੌਰ ’ਤੇ ਘੁੰਮਦੇ ਫਿਰਦੇ ਰਹੇ ਹਨ ਅਤੇ ਇਸੇ ਲਈ ਕੋਰੋਨਾ ਪੀੜਤ ਬਣ ਗਏ ਹਨ। ਆਰਮੀਡੇਲ ਖੇਤਰ ਵਿੱਚ ਅੱਜ ਸ਼ਾਮ ਦੇ 5 ਵਜੇ ਤੋਂ ਅਗਲੇ 7 ਦਿਨਾਂ ਤੱਕ ਦਾ ਤਾਲਾਬੰਦੀ ਲਾਈ ਜਾ ਰਹੀ ਹੈ। ਰਾਜ ਦੇ ਸਿਹਤ ਮੰਤਰੀ ਬਰੈਡ ਹੈਜ਼ਰਡ ਨੇ ਉਕਤ ਖੇਤਰ ਵਿਚਲੇ ਲੋਕਾਂ ਨੂੰ ਤਾਲਾਬੰਦੀ ਦੇ ਨਿਯਮਾਂ ਦਾ ਪਾਲਣ ਕਰਨ ਅਤੇ ਕਰੋਨਾ ਤੋਂ ਬਚਾਉ ਦੀਆਂ ਹਦਾਇਤਾਂ ਦਿੱਤੀਆਂ ਹਨ। ਇਹ ਵੀ ਜਾਣਕਾਰੀ ਮਿਲੀ ਹੈ ਕਿ ਮਰਨ ਵਾਲੇ ਲੋਕਾਂ ਦੇ ਹਾਲੇ ਤੱਕ ਕੋਰੋਨਾ ਵੈਕਸੀਨ ਨਹੀਂ ਲਵਾਈ ਸੀ। ਜ਼ਿਕਰਯੋਗ ਹੈ ਕਿ ਇਸ ਸਮੇਂ ਰਾਜ ਅੰਦਰ 345 ਲੋਕ ਜੋ ਕਿ ਕੋਵਿਡ-19 ਤੋਂ ਗ੍ਰਸਤ ਹਨ, ਹਸਪਤਾਲਾਂ ਅੰਦਰ ਭਰਤੀ ਹਨ ਅਤੇ ਜ਼ੇਰੇ ਇਲਾਜ ਹਨ ਜਦੋਂ ਕਿ 56 ਲੋਕ ਆਈ.ਸੀ.ਯੂ. ਵਿੱਚ ਹਨ।
ਇਸੇ ਤਰ੍ਹਾਂ ਵਿਕਟੋਰੀਆ ਰਾਜ ਦੇ ਸਿਹਤ ਅਧਿਕਾਰੀਆਂ ਵਲੋਂ ਦਿਤੀ ਗਈ ਜਾਣਕਾਰੀ ਅਨੁਸਾਰ ਲੰਘੇ 24 ਘੰਟਿਆਂ ਵਿਚ ਕੋਰੋਨਾ ਦੇ 29 ਨਵੇਂ ਮਾਮਲੇ ਮਿਲੇ ਹਨ। ਜਾਣਕਾਰੀ ਅਨੁਸਾਰ ਰਾਜ ਅੰਦਰ ਬੀਤੇ ਵੀਰਵਾਰ ਤੋਂ ਅਗਲੇ 7 ਦਿਨਾਂ ਤੱਕ ਦਾ ਲਾਕਡਾਊਨ ਲਗਾਇਆ ਗਿਆ ਹੈ। ਇਥੇ ਦਸ ਦਈਏ ਕਿ ਇਹ ਸਾਰੇ ਮਾਮਲੇ ਪਹਿਲਾਂ ਵਾਲੇ ਮਾਮਲਿਆਂ ਨਾਲ ਹੀ ਜੁੜੇ ਹਨ। ਇਹ ਵੀ ਪਤਾ ਲੱਗਾ ਹੈ ਕਿ ਪੀੜਤ ਲੋਕ ਆਪਣੇ ਇਨਫੈਕਸ਼ਨ ਦੌਰਾਨ ਕੁਆਰਨਟੀਨ ਵਿੱਚ ਨਹੀਂ ਸਨ ਅਤੇ ਹੁਣ ਇਸ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਇਸ ਹਿਸਾਬ ਨਾਲ ਰਾਜ ਅੰਦਰ ਇਸ ਸਮੇਂ ਕੁੱਲ ਕੋਰੋਨਾ ਦਾ ਅੰਕੜਾ 97 ਹੋ ਗਿਆ ਹੈ। ਹੀਥਡੇਲ ਕ੍ਰਿਸਚਨ ਕਾਲੇਜ ਅਤੇ ਹਾਪਰਜ਼ ਕਰਾਸਿੰਗ ਦਾ ਵੈਰਿੰਗਾ ਪਾਰਕ ਸਕੂਲ ਵਿੱਚ ਵਿਦਿਆਰਥੀ ਕੋਰੋਨਾ ਪੀੜਤ ਮਿਲੇ ਹਨ ਅਤੇ ਸਕੂਲਾਂ ਨੂੰ ਸ਼ੱਕੀ ਸੂਚੀ ਵਿੱਚ ਪਾ ਦਿਤਾ ਗਿਆ ਹੈ। ਇਸ ਤੋਂ ਇਲਾਵਾ ਕੋਰੋਨਾ ਦਾ ਇੱਕ ਹੋਰ ਨਵਾਂ ਮਾਮਲਾ ਅਲ-ਤਕਵਾ ਕਾਲੇਜ (ਮੈਲਬੋਰਨ) ਵਿੱਚ ਵੀ ਮਿਲਿਆ ਹੈ।
ਕੁਈਨਜ਼ਲੈਂਡ ਵਿੱਚ ਮਿਲੇ ਕੋਰੋਨਾ ਦੇ ਹੋਰ ਮਾਮਲੇ
ਲੰਘੇੇ 24 ਘੰਟਿਆਂ ਦੌਰਾਨ ਕੁਈਨਜ਼ਲੈਂਡ ਅੰਦਰ ਕੋਰੋਨਾ ਦੇ 13 ਨਵੇਂ ਮਾਮਲੇ ਮਿਲੇ ਹਨ। ਇਸ ਸਬੰਧੀ ਜਾਣਕਾਰੀ ਵਧੀਕ ਪ੍ਰੀਮੀਅਰ -ਸਟੀਵਨ ਮਾਈਲਜ਼ ਵੱਲੋਂ ਸਾਂਝੀ ਕੀਤੀ ਗਈ ਹੈ। ਇਥੇ ਦਸ ਦਈਏ ਕਿ ਇਕ ਨਵੇਂ ਮਾਮਲੇ ਨੂੰ ਛੱਡ ਕੇ ਬਾਕੀ ਸਾਰੇ ਪਹਿਲਾਂ ਵਾਲੇ ਮਾਮਲਿਆਂ ਨਾਲ ਸਬੰਧਤ ਹਨ। ਮਤਲਬ ਕਿ ਇਹ ਅੱਜ ਵਾਲੇ ਕੋਰੋਨਾ ਮਾਮਲੇ ਇੰਡੂਰੂਪਿਲੀ ਕਲਸਟਰ ਨਾਲ ਜੁੜੇ ਹਨ। ਹੁਣ ਇੱਕ ਹਫ਼ਤੇ ਦੀ ਤਾਲਾਬੰਦੀ ਐਤਵਾਰ ਨੂੰ ਸ਼ਾਮ ਦੇ 4 ਵਜੇ ਤਕ ਖਤਮ ਹੋਣ ਦੀ ਸੰਭਾਵਨਾ ਹੈ। ਇਸ ਸਬੰਧੀ ਮੁੱਖ ਸਿਹਤ ਅਧਿਕਾਰੀ ਡਾ. ਜੀਨੇਟ ਯੰਗ ਦਾ ਕਹਿਣਾ ਹੈ ਕਿ ਉਹ ਪਹਿਲਾਂ ਦਿਨ ਦੀਆਂ ਗਤੀਵਿਧੀਆਂ ਅਤੇ ਕੋਰੋਨਾ ਦੇ ਆਂਕੜਿਆਂ ਨੂੰ ਜਾਂਚਣਗੇ ਫਿਰ ਹੀ ਅੰਤਮ ਫੈਸਲਾ ਲਿਆ ਜਾ ਸਕਦਾ ਹੈ।