ਮਨੀਲਾ (ਏਜੰਸੀ) : ਦੱਖਣੀ ਚੀਨ ਸਾਗਰ ਦੇ ਇਕ ਟਾਪੂ ਨੂੰ ਲੈ ਕੇ ਫ਼ਿਲਪੀਨਜ਼ ਤੇ ਚੀਨ ਵਿਚਾਲੇ ਜ਼ੁਬਾਨੀ ਜੰਗ ਤੇਜ਼ ਹੋ ਗਈ ਹੈ। ਇਸ ਟਾਪੂ ’ਤੇ ਫ਼ਿਲਹਾਲ ਫ਼ਿਲਪੀਨਜ਼ ਦਾ ਕਬਜ਼ਾ ਹੈ। ਉਸ ਨੇ ਚੀਨ ਨੂੰ ਕਿਹਾ ਹੈ ਕਿ ਉਹ ਇਸ ਟਾਪੂ ਨੇੜਿਉਂ ਅਪਣੇ ਜਹਾਜ਼ ਅਤੇ ਮੱਛੀ ਫ਼ੜਨ ਵਾਲੀ ਕਿਸ਼ਤੀ ਹਟਾ ਲਵੇ। ਦੂਜੇ ਪਾਸੇ ਚੀਨੀ ਫ਼ੌਜ ਨੇ ਅਪਣੀ ਖ਼ੁਦ-ਮੁਖ਼ਤਿਆਰੀ ਦਾ ਦਾਅਵਾ ਕਰਦੇ ਹੋਏ ਕਿਹਾ ਹੈ ਕਿ ਉਹ ਇਸ ਖੇਤਰ ਦੀ ਰਖਿਆ ਕਰੇਗਾ।
ਏਸ਼ੀਆ ਦੇ ਦੋ ਗੁਆਂਢੀਆਂ ਵਿਚਾਲੇ ਇਹ ਵਿਵਾਦ ਥਿਟੂ ਟਾਪੂ ਨੂੰ ਲੈ ਕੇ ਹੈ। ਰਣਨੀਤਕ ਤੌਰ ’ਤੇ ਅਹਿਮ ਜਲ ਖੇਤਰ ’ਚ ਦੋਵੇਂ ਦੇਸ਼ਾਂ ਵਿਚਾਲੇ ਇਸ ਸਬੰਧੀ ਦੋ ਮਹੀਨੇ ਤੋਂ ਤਣਾਅ ਵੱਧ ਗਿਆ ਹੈ। ਮਨੀਲਾ ’ਚ ਵਿਦੇਸ਼ ਵਿਭਾਗ ਨੇ ਕਿਹਾ ਕਿ ਉਸ ਨੇ ਚੀਨ ਦੀ ਲੰਬੇ ਸਮੇਂ ਤਕ ਮੌਜੂਦਗੀ ਤੇ ਮੱਛੀ ਮਾਰਨ ਦੀਆਂ ਬੇੜੀਆਂ ਦੀਆਂ ਨਾਜਾਇਜ਼ ਸਰਗਰਮੀਆਂ ਵਿਰੁਧ ਕੂਟਨੀਤਕ ਵਿਰੋਧ ਦਰਜ ਕਰਵਾਇਆ ਹੈ। ਉਸ ਨੇ ਕਿਹਾ ਕਿ ਚੀਨ ਨੂੰ ਟਾਪੂ ਨੇੜਿਉਂ ਅਪਣਾ ਜਹਾਜ਼ ਵਾਪਸ ਬੁਲਾ ਲੈਣਾ ਚਾਹੀਦਾ ਹੈ, ਜਿਹੜਾ ਫ਼ਿਲਪੀਨਜ਼ ਦਾ ਅੰਦਰੂਨੀ ਹਿੱਸਾ ਹੈ।